رواية سحر سمرة(الفصل الحادي والعشرون إلى الثلاثون) بقلم أمل نصر

وبداخل غرفة المكتب ثار عليه ” تيسير ” وهو يقول:
– انت اتجننت يارؤوف؟ بتعرض حياتك للخطر عشان واحده متعرفهاش لا وكمان خدامة…
– ماتقولش عليها خدامة يا” تيسير ” واحترم نفسك .
قالها بحده اجفلت الاَخر فتشدق قائلاً
– يعنى الحق عليا ..انى خايف عليك لتتورط مع ناس زى دول صعايدة ممكن يق*تلوك بقلب مليان دفاعاً عن الشرف .
تجاهل حديثه ليسأله بعملية :
– انت جبت كل الاوراق اللى قولتلك عليها ولا فى حاجه تانى ناقصة ؟
اخرج الاوراق من حقيبته السوداء الصغيرة ووضعها امام ” رؤوف ” على مكتبه حانقاً ..فتجاهله الاَخر مرة ثانية وهو يراجع فى بعض الاوراق والملفات بغير اكتراث.
………………………

خرج “تيسير ” من القصر حانقاً :
وبمجرد دخوله السيارة طلب رقمها الذى يعلمه عن ظهر قبب .
– الوو… ايوه ياست ” صافى ” خليكى انتى كده نايمه على نفسك والدنيا هنا خربانه وشكل اللى انتى خايفة منه هايحصل بجد !
صرخت مجفلة
– هو فيى ايه بالظبط ” ياتيسير ” ؟ ماتفهمني ايه اللى حاصل يازفت انت !

….

الفصل الرابع والعشرون

دلف ” سليمان ” الى منزله وهو يهتف بصوتٍ عالى :
– بت يا” رضوى ” انتى فين يابت ؟
أتت زوجته على صوت ندائه وتلتها ابنتها التى خرجت من غرفتها مجفلة :
– في ايه يابوى مالك بتنده عليا ليه ؟
جلس الرجل على اريكته يرد عليها بحماس :
– خطيبك رجع البلد يابت .
أجفلت تسأله بلهفة :
– انت جصدك على ” قاسم ” يابوى؟
ضحك الرجل بمرح :
– هو انت مخطوبة لحد غيره يامخبلة ؟ ايوه ” قاسم ” ياختى.. توى على طول سامع انه وصل البلد مع صاحب الندامة ” محسن ” واض المرحوم صابر .
جلست بجواره ” نعيمة ” كى تسأله :
– طب وانتوا ماعرفتوش هما كانوا جاعدين الفترة اللى فاتت دى كلها فين ؟
اجابها الرجل وعيناهُ على ابنتهُ التى لجمتها المفاجأه عن الكلام :
– ياستى انا على حسب ما سمعت من ” رفعت ” جبل كده انهم كانوا بيدورا على مجصوفة الرجبة ” سمرا” .
نعيمة بقلق :
– طب وصلوا لحاجة على كده ؟ ولا غيبتهم طلعت على فاشوش؟
– معرفش بس كل حاجة هاتبان لما نجعد معاه ونشوفه وبالمرة كمان نسأله عن موضوع جوازتوا ب” رضوى ” المعلجة .. واحنا معارفينش راسنا من رجلينا .
تحركت ” رضوى ” بألية تذهب الى غرفتها ..وقد اكتست ملامحها بالحزن بعد هذه اللهفة الغريبة التى شعرت بها فور علمها بخبر وصوله .. مازال قلبها الخائن يشتاق الى رؤيته .. اعمى البصر والبصيرة الذى لم ولن يرى سواها هذه المحظوظة دائماً “سمره “!
…………………………..